Во КИЦ „Офицерски дом“ во Битола на 12 август (под раководство на уметничкиот директор В.Ѓ.Рафик) беше отворено второто „Меѓународно биенале на минијатурна уметност – графика и цртеж“ . На истото учествуваат 600 автори од 80 држави со повеќе од 800 дела. Според пристигнатите остварувања и релевантноста на авторите во меѓународни размери, оваа манифестација се вбројува меѓу најважните во светот. Мошне важно е што веќе е предвидено истото да биде пренесено и во Грција, Србија и Романија, а се преговара и за Полска бидејќи од земјата има повеќе од 100 учесници.
На свеченото отворање на битолскиот уметник Ранко Струмениковски постхумно беше доделено признание за неговита сликарска и графичка дејност, а пред се за неговата пионерска и основоположничка активност во локалната средина од областа на графичкиот дизајн.
Истовремено, на Гоце Божурски му беше доделено високо меѓународно признание – „Специјална награда за значаен придонес и ликовни достигнувања во минијатурната уметност“. Во рамките на Биеналето Божурски се претставува и со самостојна изложба. Станува збор за еден грандиозен полиптих „Сонот од 1001 ноќ“ со димензии 10 х 1 м. кој всушност е составен од 1001 минијатури. Беа поставени и шест минијатурни книги „101 љубовна приказна“ во кои се содржани по 101 цртеж. Работени се во специфична, автентична, исклучително невообичаена, иновативна, единствена и сосема лично креирана техника која се потпира и надоврзува на „фротажот“. Нежните цртачки третирања создаваат форма налик на „графити“ инкорпорирани во атмосфера на доминантна поетика на просторот. Во нив се негува еден мошне префинет, суптилен рафинман со милузлива и лирска чувствителност. Подлогите со разни текстури, апстрактни и асоцијативни контексти кореспондираат со реално постоечки структури врежани во подлогите кои отстапуваат простор за бројни имиња и иницијали на вљубени. Такви емоционални и чувствени состојби се потенцирани со вгравирани срца како излив на бескрајно голема и вечна љубов. Но, пораката е и универзална – за сакањето во поширок контекст, за добрината, човечноста…
